1 Macc 5

Mahwen kei ong Wehi Keren kan

(Tehk 2 Makapi 10.14-33; 12.10-45)

1 Ni ahnsou me wehi keren kan rongada me mehn Suhs ako kauwadahr pei sarawio oh onedahr Tehnpas Sarawio duwehte mehn mahso, re inenen lingeringerkihda kowahlap, 2 kahrehda re koasoanehdi mehn Suhs koaros me kin mihmi nanpwungarail en kamwomwmwomwla. Irail eri tapihada kaloke oh kemeirailla.

3 Pwehki mehn Idumea ko ar karompwa mwekid en mehn Israel ko, Sudas mahweniong irail nan Akrapahteni, kaloweiraildi oh adihasang ar kepwe kan. 4 E pil kaloke mehn Paean me kin kalap wia me suwediong mehn Israel kan ni ar kin rukih oh lidipihdi mehn Israel me kin seiloak kan. 5 E kapilpene mehn Paean kan oh idingkin irail re en mihmihte nan ar wasahn mahwen kan, oh kahukihla me e pahn kamwomwirailla oh isikala ar wasa kan iangahki aramas koaros me mihmi wasa ko. 6 Mwuhr, e ahpw mwekidla nan sapwen mehn Ammon kan, wasa e kasaingidi lapalahn karis kehlail ehu me ohl emen me adaneki Timoty kaunda. 7 Sudas mahweniongirailehr pak kei, ahpw met e pil kaloweiraildi oh kamwomwirailla. 8 Mwurin eh kalowehdi Saser oh kahnimw kan me mi limwah, e ahpw pwuralahng Sudia.

9 Mehn liki kan me kin mihmi Kilead ahpw pokonpene pwe re en mahweniong oh kamwomwala mehn Israel ko me kin mihmi rehrail. Ahpw mehn Israel ko tangpenehng nan wasahn mahwen en Datema, 10 re ahpw kadaralahng Sudas oh rie ko kisinlikou kiset me ketihtihki: “Mehn liki kan ehupenehr pahn kaweidpen Timoty. Re onohnop re en kohdo oh mahweniong wasahn mahwen me se tangpenehr ie pwe re en kamwomwkitala. 12 Me tohto reht kamakamalahr. Komw ketido mwadang oh kapitkitala! 13 Riat mehn Suhs koaros me kin mihmi Top kamakamalahr, mehn liki kan wahsangehr ar pwoud kan, nair seri kan oh ar kepwe kan. Re kemelahr aramas kereniong kid wasao.”

14 Nindokon ar wadewadek kisinlikowo, meninkeder kei pa leledo sang Kalili wa kohdo soangen pakairohte, nan ar nsensuwed laud re ahpw tehrpeseng ar likou kan. 15 Re patohwan: “Mehn Tolemais, mehn Dair, mehn Saidon oh mehn liki kan koaros en Kalili ehupenehr pwe re en kamwomwkitala.”

16 Ni Sudas oh aramas koaros ar rongada pakair pwukat, re pokonpene pwe re en wiekupwurki dahme pahn wiawi pwe re en sewese riarail ko me milahr nan apwal laud pwehki arail imwintihti ko. 17 Sudas eri ndaiong rie Saimon: “Pilada ekei sounpei oh kohwei doarehla riatail mehn Suhs ako me mihmi Kalili; riatail Sonadan oh ngehi se pahn kohla Kilead.” 18 E ahpw kihdi luhwen nah kariso nan Sudia pwe re en sinsile wasao iangahki kaun riemen, Asaraia oh Sosep nein Sekaraia pwe ira en apwahpwalih aramas ako. 19 E ahpw ndaiong ira: “Kumwa apwahpwalih aramas pwukat, oh dehr mahweniong mehn liki kan, se lao pwurodo.” 20 Sounpei 3,000 eri iangada Saimon kolahng Kalili, oh 8,000 luhwehdi pwe re en iang Sudas kolahng Kilead.

21 Saimon eri kohla Kalili oh mahweniong mehn liki kan wasao pak tohto. Ih eri kaloweirildi 22 oh pwakih irail lao lel ni kahnimw en Tolemais. Sounpei kereniong 3,000 mehn liki me e kemehla oh kihpene dipwisou lohdi ko. 23 Ih eri ale mehn Suhs ko me mihmi Kalili oh Arpahta, iangahki ar pwoud kan, oh nair seri kan oh arail kepwe kan koaros, oh wairaildohng Sudia ni peren laud.

24 Ni ahnsowo Sudas Makapius oh rie Sonadan kotehla Pillap Sordan oh sapasapalki rahn siluh nan sapwtehn. 25 Ira eri tuhwong mehn Napatea kei wasao me kasamwo ira ni meleilei oh ndaiong ira mehkoaros me wiawihong mehn Suhs kan me mihmi Kilead. 26 Re pakairkihong ira duwen mehn Suhs tohto me lekdekiong nan kalapwus nan kahnihmw kan en Posra, Posor, Alema, Kaspo, Maked oh Karnaim, 27 a ekei selidi nan kisin kahnimw kan en Kilead. Re pil ndaiong ira me imwintihti ko pil koasoanedier me mandahsang rahno re pahn mahwenih en mehn Suhs kan wasahn mahwen kan, kalowehdi oh kemehla aramas koaros rahnteieu.

28 Sudas oh nah kariso mwadangete wekidek oh kotehla sapwtehn pwe re en mahweniong Posra, re kalowehdi kahnimwo oh kemehla aramas koaros nan kahnimwo. Mwurin ar alehdi dipwisou koaros, re ahpw isikala kahnimwo. 29 Re mweselsang wasao nipwong kohkolahng wasahn mahwen en Dadema. 30 Ninsohrahno Sudas oh nah sounpei ko kilangada lapalahn karis ehu me mahmahwenih wasahn mahweno; re weuwapene kehndake kei, pasapas kei, tuhke kei me re pahn doakoakipeseng ewen kelen mahweno. 31 Ni Sudas eh rongada katairong, werwer, oh ngilen sowi ko me peipeidohsang nan kahnimwo, e esehda me mahwen tepidahr, 32 ih eri ndalahng nah sounpei ko, “Rahnwet kumwail pahn mahwenki riatail mehn Suhs kan!”

33 E ahpw koasoanediong nah sounpei ko re en mwekidla ni kahng siluh mwurin imwintihtio oh mahweniong irail. Ni ar mwekidla, re peuk sowi kan oh ngihl laudki ar kapakap. 34 Ni ahnsou nein Timoty sounpei ko tehkada me Sudas Makapius mwo, re pweiekla oh tangdoaui. Sudas eri kaloweiraildi oh kemehla sounpei 8,000. 35 Mwuhr, Sudas uhd kolahng Alema, ^{▼▼ ALEMA: Eden kahnimw wet sohte dehde.} mahweniong oh kalowehdi oh kemehla ohl koaros en kahnimwo. Oh mwurin eh kihsangehr dipwisou lohdi kan, e ahpw isikala kahnimwo.

Mahwen kei ong Wehi Keren kan

(Tehk 2 Makapi 10.14-33; 12.10-45)

36 E ahpw mwekid sang wasao oh kalowehdi Kaspo, Maked, Posor oh kahnimw teikan en Kilead.

37 Mwurin wiewia pwukat, Timoty ahpw kapokonepene pil ehu karis en sounpei oh kauwada ar kahnimpwal sallahng Rapon palio pillap ehu. 38 Sudas kadarala lipoahrok kei pwe re en lipoahroke ar kahnimpwalo; re ahpw pwurodo oh pakairkihong me mehn liki kan koaros wasa pwuko iangalahr Timoty oh wiadahr lapalahn karis ehu. 39 Timoty pil aleier sawas sang rehn mehn Arepia kan oh re kauwadahr ar kahnimpwal palio pillapo oh onopadahr pwe re en mahweniong Sudas. Sudas eri mwekidla pwehn mahweniong irail.

40 Ni Sudas oh nah kariso eh kerendohng ni pihlo, Timoty ndaiong nah kaunen sounpei ko, “Ma e nannantihdohte oh kotehdo pihlo, kitail pahn sohla kak pelianda, oh e uhdahn pahn kaloweikitaildi. 41 Ahpw ma e per oh kauwada eh kahnimpwalo palio pihl, kitail pahn kotehla pihlet oh kalowehdi.” 42 Ni Sudas eh lel ni keilen pillapo, e ruweseiong nah kaunen sounpei kan kaleke re mweidong emen en uhdi ahpw en sikenlahng irail nan mahweno. 43 Sudas me tiengala oh kotehla mahs pihlo kolahng imwintihti kan, nah sounpei koaros ahpw idawehnla. Mehn liki ko uhdahte kesehla ar tehtehn mahwen ko oh sopolahng nan tehnpas sarawien me rotorot akan nan Karnaim. 44 Sudas oh nah sounpei ko eri kalowehdi kahnimwo oh isikada tehnpas oh mehkoaros me mi loale. Ni Karnaim eh lohdier pahn manaman en Sudas, sohla mehn liki men kak uhwong ih.

45 Sudas eri kapokonepene mehn Israel ko koaros me mihmi Kilead pwe re en kapwureiraillahng Sudia. Lapalahn pokon ehu en soangen aramas koaros, iangahki ar pwoud kan, nair seri kan oh mehkoaros me re ahneki. 46 Re kohla lel Epron, kahnimw laud oh kehl kehlail ehu. Eri, re sohte kak keidla ni palimaun de palimeing en kahnimwo, pwe ahlo kotehlahte kahnimwo, kahrehda re uhdahn pahn kotehla kahnimwo. 47 Ahpw tohn kahnimwo sohte mweidohng re en kotehla, re ahpw koasoakehda takai kei ni ewen kehl kan en kahnimwo. 48 Sudas eri kadaralahng irail ni meleilei pakair wet: “Se men patohwan kotehwei amwail kahnimwen pwe se en patohwohng nan at tungoal wasa. Sohte apwal ehu pahn wiawihong kumwail. Se men kotehweite.” Ahpw re sohte langadahng irail ewen kehl ko.

49 Sudas eri padahkihong pokono, re en kauwada ar kahnimpwal kan wasa re mihmi ieo. 50 Sounpei ko ahpw ale pakair en onopada pwe re en mahweniong kahnimwo. Re ahpw mahmahweniong rahn ehu pwon oh pwong ehu pwon, lao re kalowehdi. 51 Irail eri kemehla ohl koaros en Epron, kihsang dipwisou ko oh kauwehla kahnimwo. Re ahpw kotehla kahnimwo alu pohn paliweren me melahr ako. 52 Re pil kotehla Sordan kolahng nan patapat me sallahngete Ped San. 53 Erein ar mwekimwekid kohla Sudas kin koakoangngoange me pwangadahr ako lao re lellahng nan Sudia. 54 Ni ar lel mwo oh kohdahla pohn Nahna Saion, re ahpw pereperen oh wiewia ar kapingkalahngan oh wia meirong isihs pwehki ar pwurodohr nsenamwahu sohte emen rehrail me mehla.

55 Nindokon Sudas oh Sonadan ara mihmi Kilead oh riara Saimon mahmahweniong Tolemais nan Kalili, 56 Sosep oh Asaraia, kaunen sounpei ko nan Sudia rongada duwen ar wiewia kommwad kan oh powehdi kan. 57 Ira ahpw ndapene, “Kita pil kohla mahweniong mehn liki kan me mihmi limwahtail pwe kita en pil ndandkihla. 58 Ira eri koasoanehdi neira sounpei ko en mahweniong Samnia. 59 Korkias oh nah sounpei ko eri kohieisang nan kahnimwo pwe re en mahweniong ira. 60 Re kalowehdi Sosep oh Asaraia oh pwakihirahla lel ni irepen Sudia. Ni rahno sounpein Israel kereniong 2,000 me mehla. 61 Lapalahn lohdi wet pweidahr pwehki kaunen sounpein mehn Suhs ko ar men wiahla aramas ndand oh sohte peikiong Sudas oh rie ko. 62 Oh kaidehn ira pil kisehn peneineien Makapi, me Koht ketin piladahr pwe re en kahredohng mehn Israel kan nan ar saledek.

63 Ahpw Sudas Makapius oh rie ko inenen ndandla nan Israel oh rehn mehn liki kan koaros. Ni ahnsou me aramas akan kin rong duwen ara ndand, 64 re kin pokonpene pwe re en kin kapinga ira.

65 Sudas oh rie ko eri kohla mahweniong mehn Edom kan ni palieir. Sudas mahweniong oh kalowehdi Epron oh kahnimw kan me kapilpene, kauwehla wasahn mahwen kan oh isikala wasahn iroir kan me mi limwah. 66 E ahpw mweselsang wasao kolahng sapwen mehn Pilisdia kan oh kotehla Marisa. 67 Rahno samworo kei kamakamala nan mahwen pwehki ar men ndandla oh iang mahwen ni sohte nsenohki ale kaweid. 68 Sudas eri wetlahng Asdod nan Pilisdia. E kauwehla ar pei sarawi kan, oh isikala sansal en arail koht kan, oh kihsang dipwisou en nan kahnimw kan, e ahpw pwuralahng Sudia.